SARRERA (15 eta 18 urte bitartean)

Bake hezkuntzarekin loturiko edukiak lantzeko modua taldeko haurren une ebolutiboaren menpe dago. Une ebolutibo hori, berriz, haurren adinarekin estu lotuta dago.

Oraingoan, taldea 15 eta 18 urte bitarteko gaztez osaturik dago, eta guk honako hau proposatzen dugu: talde prozesuaren bost pausoak jarraitzea, pauso bakoitza beraien adinera eta gaitasunetara egokituz. Ondorioz, gazte hauek beste adinetakoek baino sakonago aztertuko dituzte indarkeriarik eza eta pertsona ez-bortitzaren jarrerak eta baloreak.

Talde prozesuaren azkeneko fasean, alegia, gatazken ebazpenean, taldekideek beren ingurune hurbileko benetako gatazkak aztertuko dituzte. Horrek gatazkak konpontzeko modu egokiagoak eta kreatiboagoak aurkitzen lagunduko die, eta konponbide horiek probatu egingo dituzte.